చెన్నైలో పగలు.. ముంబైలో రాత్రి... కాజల్‌పై కోలీవుడ్ ఆగ్రహం..!

సినిమాల్లో తారలకు అవకాశాలు లేకుంటే ఒక సమస్య, అధికమైతే మరో సమస్య. ప్రస్తుతం నటి కాజల్ అగర్వాల్ రెండో రకం సమస్యను ఎదుర్కొంటారు. ఈ ఉత్తరాది భామకి తొలుత విజయాలు అందించింది టాలీవుడ్. ఆ తర్వాత కోలీవుడ్, బాలీవుడ్ అంటూ పలు విజయాలతో తన ఖాతాని పెంచుకుంటూ పోయింది. 

 

ఇటీవల అమ్మడుకి తెలుగు ఆకాశాలు తగ్గుముఖం పట్టాయి. తమిళంలో కూడా అంతంత మాత్రంగానే ఉన్న అవకాశాలు ఇప్పుడు ఒక్కసారిగా పెరిగిపోయి. అదే స్థాయిలో హిందీలో కూడా ఆఫర్లు వస్తున్నాయి. 

 

దీంతో కాజల్ చెన్నై - ముంబైల మధ్య విమానాల్లో చెక్కర్లు కొడుతోంది. కాజల్ అగర్వాల్ మీద తమిళ నిర్మాతలు ఇప్పుడు ఆగ్రహంగా వున్నారు. కారణం, గతంలో ఎప్పుడూ లేనట్టుగా ఇప్పుడు షూటింగులకు ఆలస్యంగా వస్తోందట. అయితే, ఇది అమ్మడు కావాలని చేయడం లేదు. ప్రస్తుతం ఇటు తమిళ సినిమాలతో బాటు, అటు హిందీలో కూడా నటిస్తోంది. దాంతో ముంబయ్ చెన్నై నగరాల మధ్య విమానాల్లో షటిల్ సర్వీస్ చేస్తోంది.

 

రాత్రి వేళ ముంబయ్ లో హిందీ సినిమా షూటింగులో పాల్గొని, పొద్దున్నే విమానమెక్కి చెన్నై చేరుకొని, రెడీ అయి, సెట్స్‌కి వెళ్లేసరికి మధ్యాహ్నం అయిపోతోందట. దాంతో ఓ పూట షూటింగ్ కేన్సిల్ అయిపోతోంది. మళ్లీ సాయంకాలం విమానమెక్కి ముంబయ్ చెక్కేస్తోందట. దీంతో తమిళ నిర్మాతలు గగ్గోలుపెడుతున్నారని కోలీవుడ్ టాక్.