సిట్‌ విచారణకు ముమైత్‌.. ఇరకాటంలో బిగ్‌బాస్‌!

క్లిక్ చేయండి

హైదరాబాద్‌: తెలుగు సినీ పరిశ్రమను కలవరపెడుతున్న డ్రగ్స్‌ రాకెట్‌ కేసులో మరో కీలక పరిణామం. ఇప్పటివరకు ఆరుగురు సినీ ప్రముఖులను ప్రశ్నించిన ఎక్సైజ్‌ సిట్‌ అధికారులు గురువారం సినీ నటి ముమైత్‌ఖాన్‌ను ప్రశ్నించేందుకు సిద్ధమవుతున్నారు. ఆమె గురువారం సిట్‌ విచారణకు హాజరుకానున్నారని తెలుస్తోంది. ఉదయం 10 గంటలకు ఆమె విచారణకు హాజరుకానున్నారు. ఇందుకోసం ఆమె పుణె నుంచి హైదరాబాద్‌కు చేరుకోనున్నారు.

ప్రస్తుతం మొమైత్‌ఖాన్‌ జూనియర్‌ ఎన్టీఆర్‌ హోస్ట్‌గా చేస్తున్న ప్రముఖ షో బిగ్‌బాస్‌లో పాల్గొంటున్న సంగతి తెలిసిందే. ఈ షో నిబంధనల ప్రకారం ఆమె అర్ధంతరంగా బిగ్‌బాస్‌ హౌస్‌ నుంచి బయటకు రావడానికి వీల్లేదని అంటున్నారు. బిగ్‌బాస్‌లో భాగంగా పుణెలోని ఓ భవనంలో మిగతా పార్టిస్పెంట్స్‌తో కలిసి ఆమె నివసిస్తున్నారు. ఈ నేపథ్యంలో ముమైత్‌ విచారణకు వస్తారా? రారా? అన్నది ఇన్నాళ్లు ఉత్కంఠ రేపింది. ఇప్పుడు ఆమె విచారణకు రానున్నట్టు విశ్వసనీయంగా తెలుస్తోంది. ఈ నేపథ్యంలో ఆమెను బిగ్‌బాస్‌ షో నుంచి తప్పించారా? లేకుంటే సిట్‌ విచారణ నేపథ్యంలో ఒకరోజు మినహాయింపు తీసుకొని.. తిరిగి బిగ్‌బాస్‌లో పాల్గొననున్నారా? ఈ మేరకు బిగ్‌బాస్‌ షో నిబంధనలు ఏమైనా మారుస్తారా? అన్నది తెలియాల్సి ఉంది.

టాలీవుడ్‌ను కుదిపేస్తున్న డ్రగ్స్‌ కేసులో ఇప్పటివరకు దర్శకుడు పూరీ జగన్నాథ్‌, శ్యాం కే నాయుడు, తరుణ్‌, నవదీప్‌, ఆర్ట్‌ డైరెక్టర్‌ చిన్నా, చార్మి తదితరులు సిట్‌ విచారించిన సంగతి తెలిసిందే. సినీ పరిశ్రమలో మాదక ద్రవ్యాల వినియోగానికి సబంధించి లోతుగా సాగుతున్న సిట్‌ విచారణలో కీలక విషయాలు వెలుగుచూస్తున్నట్టు తెలుస్తోంది.