యాంకర్‌పై అత్యాచారం.. న్యూస్ చానల్ సీనియర్ ఎడిటర్ అరెస్ట్!

తిరువనంతపురం: న్యూస్ చానల్ మహిళా జర్నలిస్టు, యాంకర్‌పై అత్యాచారానికి పాల్పడ్డారన్న ఆరోపణలతో మలయాళ న్యూస్ చానల్ ‘మాతృభూమి’ సీనియర్ ఎడిటర్ అమాల్ విష్ణుదాస్‌ను పోలీసులు అదుపులోకి తీసుకున్నారు. తనను వివాహం చేసుకుంటానని నమ్మించి మోసం చేశాడని, లైంగికంగానూ వేధించాడన్న యాంకర్ ఫిర్యాదుతో కదిలిన పోలీసులు విష్ణుదాస్‌ను అరెస్ట్ చేసినట్టు తిరువనంతపురం నగర పోలీస్ కమిషనర్ స్పర్జన్ కుమార్ పేర్కొన్నారు. అతనిపై పలు సెక్షన్ల కింద కేసు నమోదు చేసినట్టు తెలిపారు.

 

పోలీసుల కథనం ప్రకారం.. విష్ణుదాస్‌కు ఇది వరకే వివాహమైంది. దంపతుల మధ్య మనస్పర్థల కారణంగా విడాకుల కోసం కోర్టులో దరఖాస్తు చేసుకున్నారు. ఈ క్రమంలో బాధితురాలితో పరిచయం పెంచుకున్న విష్ణుదాస్ ఆమెను వివాహం చేసుకుంటానని నమ్మించి లోబర్చుకున్నాడు. అంతేకాదు వివిధ కారణాలు చెప్పి ఆమెను పెద్దమొత్తంలో డబ్బులు కూడా తీసుకున్నాడు. అయితే భార్యతో విడాకులు మంజూరైన తర్వాత బాధితురాలికి ముఖం చాటేశాడు. ఈ విషయం ఎవరికైనా చెబితే కెరీర్ నాశనం చేస్తానని బెదిరించాడు. దీంతో ఆమె పోలీసులను ఆశ్రయించింది. కేసు నమోదు చేసుకున్న పోలీసులు దర్యాప్తు చేస్తున్నారు.