'సముద్రం' పేరుతో జగ్గూభాయ్ సీరియల్

ఫ్యామిలీ ఆడియన్స్ మెచ్చే హీరోగా కొన్నేళ్ల పాటు వెండితెరపై ఆకట్టుకున్న జగపతిబాబు.. ఇప్పుడు క్యారెక్టర్ ఆర్టిస్ట్ గా బిజీ అయ్యాడు. లెజెండ్ సినిమాతో పూర్తిస్థాయి క్యారెక్టర్ ఆర్టిస్ట్ గా మారిన జగపతి... నిన్నటి శ్రీమంతుడు వరకూ క్షణం తీరిక లేకుండా వరుస సినిమాలు చేస్తూనే ఉన్నాడు. ఇప్పటికీ జగపతిబాబు చేతినిండా సినిమాలున్నాయి. ప్రస్తుతం తెలుగులో ఎన్టీఆర్ సినిమాలో నటిస్తున్న జగపతిబాబు.. మరోవైపు తమిళ సినిమాలతోనూ బిజీగా ఉన్నాడు. ఇదిలా ఉంటే.. ఇప్పుడు జగపతిబాబు జీవితం ఆధారంగా ఓ ధారావాహిక రూపొందుతోంది!

ప్రముఖ నిర్మాత వి.బి. రాజేంద్ర ప్రసాద్ కొడుకుగా గోల్డెన్ స్పూన్ తో పుట్టి.. కథానాయకుడిగా ఎదిగిన జగపతిబాబు జీవితంలో ఎత్తుపల్లాలెన్నో! సముద్రంలోని ఆటుపోట్లకు మల్లే... జగపతి జీవితంలోనూ ఎన్నో ఒడిదుడుకులున్నాయి. అందుకే కాబోలు... జగపతిబాబు జీవితం ఆధారంగా తెరకెక్కనున్న బుల్లితెర ధారావాహికకు.. సముద్రం అనే టైటిల్ నిర్ణయించారు. పైగా ఈ పేరుతో జగపతిబాబు నటించిన సినిమా కూడా ఒకటుంది. జగపతిబాబు నేపథ్యం, హీరోగా సాధించిన విజయాలు, ఎదుర్కొన్న అపజయాలు, సోషల్ లైఫ్ తో పాటు వ్యక్తిగత జీవితంలో ఆయన వ్యవహారశైలి వంటి విషయాలను.. ఈ సీరియల్ లో జగపతిబాబే స్వయంగా వివరిస్తాడట. ఓ ప్రముఖ ఛానల్ లో పదమూడు ఎపిసోడ్స్ గా ఈ సీరియల్‌ ప్రసారం కానుంది. ఓటమి అంచుకు చేరినప్పటికీ.. నిరాశతో కుంగిపోకుండా ముందుకు సాగాలన్నదే ఈ సముద్రం సీరియల్ ప్రధాన ఉద్దేశ్యమట. అయితే... బుల్లితెర జగపతిబాబు కొత్తేమీ కాదు... గతంలోనూ కొన్ని రియాల్టీ షోస్ నిర్వహించిన అనుభవం జగ్గూభాయ్ కు ఉంది. అయితే ఈసారి తన జీవిత కథతోనే.. బుల్లితెరపై కన్పించనుండటం విశేషం. మరి.. జగపతిబాబు ఈ సీరియల్ లో ఇప్పటివరకూ చెప్పని సరికొత్త సంగతులు ఏమైనా చెబుతాడేమో చూడాలి!